ក្រសួង​ពីរ​ព្រមាន​ជា​ថ្មី​ដល់​ទូរទស្សន៍​ដែល​មិន​បញ្ចាំង​ភាពយន្ត​ខ្មែរ

ក្រសួង​ពីរ​ព្រមាន​ជា​ថ្មី​ដល់​ទូរទស្សន៍​ដែល​មិន​បញ្ចាំង​ភាពយន្ត​ខ្មែរ

ភ្នំពេញៈ មន្ត្រី​​ក្រសួង​វប្បធម៌ និង​ក្រសួង​ព័ត៌មាន​កាលពី​ថ្ងៃ​ម្សិលមិញ​បាន​​ព្រមាន​ដក​អាជ្ញាប័ណ្ណ និង​ពិន័យ​ជា​ប្រាក់​ទៅ​លើ​ស្ថានីយ​ទូរទស្សន៍​ទាំងឡាយ​​ណា​ដែល​មិន​បាន​ចាក់ ​បញ្ចាំង​ខ្សែ​ភាពយន្ត​ខ្មែរ​នៅ​ចន្លោះ​ម៉ោង ៧ ដល់​ម៉ោង​ ៩ ​យប់​ក្រោយពី​បាន​​រកឃើញ​ថា​កម្ពុជា​​​​បាន​ចំណាយ​​ទឹកប្រាក់​​ប្រមាណ ១០ លាន​ដុល្លារ ​ដើម្បី​នាំ​ចូល​ខ្សែ​ភាពយន្ត​បរទេស​មក​ចាក់​បញ្ចាំង​លើ​កញ្ចក់​ទូរទស្សន៍​ កាលពី​ឆ្នាំ​​ ២០១៥។

ប្រធាន​នាយកដ្ឋាន​សិល្បៈ​ភាពយន្ត​នៃ​ក្រសួង​វប្បធម៌ និង​វិចិត្រ​សិល្បៈ​លោក ស៊ិន ច័ន្ទសាយ៉ា បាន​ឲ្យ​ដឹង​កាលពី​ថ្ងៃ​ម្សិលមិញ​ថា​ តាម​​ការ​ស្រាវជ្រាវ​របស់​ក្រុម​លោក​នៅ​ឆ្នាំ​ ២០១៥ កម្ពុជា​បាន​នាំ​ចូល​​ភាពយន្ត​បរទេស​សម្រាប់​ចាក់​បញ្ចាំង​លើ​ស្ថានីយ​ ទូទស្សន៍​​មាន​ចន្លោះ​ពី ១៥​០០០ ​ភាគ ទៅ ២ ​ម៉ឺន​ភាគ​ដោយ​ចំណាយ​ទឹកប្រាក់​ពី​​ ៧ ​​ទៅ​​ ១០ ​លាន​ដុល្លារ។ ភាពយន្ត​ទាំងនោះ​បាន​នាំ​ចូល​ពី​ប្រទេស​ថៃ ហុងកុង កូរ៉េ​ខាង​ត្បូង ហ្វីលីពីន ចិន និង​ឥណ្ឌា​។

លោក​ថ្លែង​ថា៖«ភាពយន្ត​ហុងកុង​​ទិញ​មក​ទាំងអស់​ពី​កូរ៉េ​​ខាង​​ត្បូង​ទិញ ​​មក​ចង់​ទាំងអស់​ដែរ​ហើយ​​ចុង​ក្រោយ​នេះ​នាំ​ចូល​មកពី​ថៃ​ទៀត​អ៊ីចឹង​នាំ​ ចូល​​មក​​ចម្រុះ​ដោយសារ​មាន​តម្រូវការ​ខ្ពស់​​»។

ដើម្បី​កាត់​បន្ថយ​ការ​ចំណាយ​ខ្ជះខ្ជាយ​ជាច្រើន​លាន​ដុល្លារ​ក្នុង​មួយ​ ឆ្នាំៗ​ទៅ​ក្រៅ​ប្រទេស​ពី​ការ​​នាំ​ចូល​​ភាពយន្ត​បរទេស​​ទាំង​នេះ​លោក​ថា​ ក្រសួង​ព័ត៌មាន និង​ក្រសួង​វប្បធម៌​តម្រូវ​ឱ្យ​​​ម្ចាស់​​ស្ថានីយ​ទូរទស្សន៍​ក្នុង​ស្រុក​ រួម​ទាំង​ទូរទស្សន៍​ខ្សែកាប​ត្រូវ​ចាក់​បញ្ចាំង​ខ្សែ​ភាពយន្ត​ខ្មែរ​បើ​ពុំ​ នោះ​​ទេ​​​​នឹង​​ប្រឈម​ការ​ផាក​​ពិន័យ​ ឬ​ដក​អាជ្ញាប័ណ្ណ​ហើយ​បិទ​ស្ថានីយ​តែ​ម្តង។

លោក សាយ៉ា បាន​ទទួល​ស្គាល់​ថា​ការ​​ផលិត​ និង​ការ​ចាក់​បញ្ចាំង​​ខ្សែ​ភាពយន្ត​ខ្មែរ​លើ​​កញ្ចក់​ទូរទស្សន៍​​នៅ​មាន​ កម្រិត​នៅ​ឡើយ​ប៉ុន្តែ​ក្រសួង​នឹង​​ជួយ​បណ្តុះបណ្តាល​ផលិតករ​ខ្មែរ​ឱ្យ​មាន​ ជំនាញ​កាន់តែ​ខ្លាំង​ថែម​ទៀត​ព្រម​ទាំង​ជំរុញ​ឲ្យ​ផលិតករ​ទាំង​នោះ​បន្ត​ ផលិត​ខ្សែ​ភាពយន្ត​ខ្មែរ​​ឲ្យ​កាន់តែ​ច្រើន​ដើម្បី​បង្កើត​​ការងារ និង​លើក​ស្ទួយ​វប្បធម៌​ និង​វិស័យ​សិល្បៈ​ខ្មែរ​ជាពិសេស​​អាច​កាត់បន្ថយ​ការ​នាំ​ចូល​ភាពយន្ត​បរទេស​ ​បាន​ពី ២០ ​ទៅ​ ៣០% ​​​ក្នុង​មួយ​ឆ្នាំ។​ ក្រៅពី​នោះ​ក្រសួង​​ក៏​កំពុង​រៀបចំ​យន្តការ​ថ្មី​ដំឡើង​​តម្លៃ​នាំ​ចូល​ខ្សែ ​ភាពយន្ត​បរទេស​ឲ្យ​សមាមាត្រ​នឹង​តម្លៃ​នៃ​ការ​ផលិត​ភាពយន្ត​ក្នុង​ស្រុក​ ដើម្បី​ឲ្យ​ម្ចាស់​ស្ថានីយ​ទូរទស្សន៍​​ទាំងអស់​ងាក​មក​ទិញ​​ផលិតផល​ក្នុង​ ស្រុក​។

លោកស្រី កូវ សុធារី គ្រូបង្រៀន​នៅ​សាលា​មធ្យម​វិចិត្រ​សិល្បៈ​ផ្នែក​​ល្ខោន​និយាយ និង​ជា​ម្ចាស់​ពាន​រង្វាន់​​ផលិត​​រឿង​ «ឃ្លាត​ទៅ​សែន​ឆ្ងាយ» យល់​ថា​ការ​នាំ​ចូល​រឿង​ភាគ​បរទេស​​​ច្រើន​​លើសលប់​ពេក​មិន​ត្រឹមតែ​បាត់បង់ ​ថវិកា​ទេ​ថែម​​ទាំង​រួម​ចំណែក​​លើក​ស្ទួយ​វប្បធម៌​បរទេស​ទៅ​វិញ។

លោកស្រី​ថា៖ «មិនមែន​ថា​កាត់ផ្តាច់​ទាំង​ស្រុង​ទេ​យើង​​​ត្រូវ​​ទទួល​ស្គាល់​វប្បធម៌​ របស់​​គេ​​ខ្លះ​ដែរ​តែ​យើង​ត្រូវ​​​កាត់​បន្ថយ​ខ្លះ​ហើយ​បង្កើន​សមត្ថភាព និង​លើក​ទឹកចិត្ត​ផលិតករ​ក្នុង​ស្រុក​វិញ​»។

កាលពី​ដើម​ខែ​កុម្ភៈ​ក្រសួង​ព័ត៌មាន​ធ្លាប់​បាន​ចេញ​សេចក្តី​ជូន​ដំណឹង​​ មួយ​ក្រើន​រំឭក​ដល់​ម្ចាស់​ស្ថានីយ​ទូរទស្សន៍​ទាំងអស់​ជាពិសេស​ម្ចាស់​​ ក្រុមហ៊ុន​ទូរទស្សន៍​ខ្សែកាប​ត្រូវ​តែ​​ចាក់​បញ្ចាំង​​​ខ្សែ​ភាពយន្ត​ខ្មែរ​ ​​នៅ​ចន្លោះ​ម៉ោង​ ៧ ដល់​ម៉ោង ៩ យប់។

អ្នក​នាំ​ពាក្យ​ក្រសួង​ព័ត៌មាន​លោក អ៊ុក គឹមសេង បាន​​ថ្លែង​​ថា​ក្រសួង​នឹង​​​ជូនដំណឹង​ជាថ្មី​ម្តង​ទៀត​​ដល់​ម្ចាស់​ស្ថានីយ ​ទូរទស្សន៍​​ទាំងអស់​ពី​ការ​ចាក់​បញ្ចាំង​​ខ្សែ​ភាពយន្ត​ខ្មែរ​នេះ​ព្រោះ​​ កន្លង​មក​លោក​សង្កេត​​ឃើញ​ថា​ទូរទស្សន៍​ខ្សែ​កាប​​នៅ​​មិន​​ទាន់​អនុវត្ត​ តាម​នៅ​ឡើយ។

លោក​ថា៖ «ក្រសួង​នឹង​​ពិនិត្យ​មើល​អាជ្ញាប័ណ្ណ​ឡើង​វិញ​បើ​ស្ថានីយ​ណា​មាន​ការ​​ បំពាន​ម្តង​ហើយ​ម្តង​ទៀត​យើង​​នឹង​យក​​ករណី​​នេះ​​ទៅ​តុលាការ»៕

 

ថ្ងៃទី០៥ខែកម្ភៈឆ្នាំ២០១៦

ប្រភពៈ ភ្នំពេញប៉ុសិ៏


Was This Post Helpful:

0 votes, 0 avg. rating

Leave a Comment