កម្ពុជា​ អាច​ជា​គោលដៅ​ថ្មី​សម្រាប់​និវត្ដ​ជន​ជប៉ុន

កម្ពុជា​ អាច​ជា​គោលដៅ​ថ្មី​សម្រាប់​និវត្ដ​ជន​ជប៉ុន

ខណះ​ដែល​ប្រទេស​កម្ពុជា​បាន​ក្លាយជា​ផ្ទះសំបែង​សម្រាប់​ពួក​អឺរ៉ុប ​មួយចំនួន ដែល​ស្វែងរក​ការ​ស្នាក់នៅ និង​ចូល​និវត្ដន៍​តាំងពី​យូរ​មកហើយ​នោះ ប្រទេស​នេះ​ក៏​កំពុងតែ​ក្លាយជា​គោលដៅ​ថ្មី​ផង​ដែរ​សម្រាប់​និវត្តជន​ជប៉ុន ដែល​ស្វែងរក​គោលដៅ​ចូលនិវត្តន៍​មួយ​ប្រកបដោយ​សុខុមាលភាព ព្រម​ទាំង​​កាត់​បន្ថយ​ការ​ចំណាយ​ខ្ពស់។

ជនជាតិ​ជប៉ុន​បាន​ឲ្យ​ដឹង​ថា ទោះជា​យ៉ាងណា នៅពេល​ដែល​​វិស័យ​សុខាភិបាល​ដ៏​រឹងមាំ​មួយ​អាចបំពេញ​តម្រូវការ​រ​បស់​ពួកគេ​ នោះ និវត្តជន​ជប៉ុន​ទាំង​នោះ នឹង​បន្ដ​ធ្វើដំណើរ​ទៅ​ស្នាក់​នៅ និង​ចូលនិវត្តន៍​នៅ​ប្រទេស​មានការ​អភិវឌ្ឍ​បន្ថែម​។​

​យោងតាម​លោក Yoshihiro Abe លេខា​ទី ១ នៃ​ស្ថានទូត​ជប៉ុន នៅ​រាជធានី​ភ្នំពេញ បាន​ឲ្យ​ដឹងថា ថ្មីៗ​នេះ ចំនួន​ពលរដ្ឋ​ជប៉ុន​កំពុង​រស់​នៅ​ក្នុង​ប្រទេស​កម្ពុជា មាន​ប្រហែល ២៥០០ នាក់​។ ទោះជា​យ៉ាងណាលោក​បន្ថែមថា ចំនួន​អាចមាន​ច្រើនជាង​នេះ​។​

​លោក Naoaki Kamoshida មន្ត្រី​កុងស៊ុល​ប្រចាំ​ស្ថានទូត​ជប៉ុន​បាន​ប្រាប់ថា​ ៖ «​គិត​ត្រឹម​ខែមករា ឆ្នាំនេះ ពលរដ្ឋ​ជប៉ុន​ដែល​មាន​អាយុ​ចាប់ពី ៦០ ឆ្នាំ​ឡើង និង​ដែល​បានរាយការណ៍​ជាមួយ​ស្ថានទូត​ជប៉ុន​នោះ មាន​ចំនួន​ប្រហែល ៣០០ នាក់ ពោលគឺ​បាន​កើនឡើង ៣០ ភាគ​រយ បើ​ធៀប​ទៅនឹង​ឆ្នាំ​មុន»កន្លង​មក។​

​លោក Tani Shunji នាយក​ប្រតិបត្តិ​នៃ​ក្រុមហ៊ុន Tanichu Assetment ដែលជា​ក្រុមហ៊ុន​វិនិយោគ​អចលនទ្រព្យ​ជប៉ុន ​នៅ​កម្ពុជា បាន​និយាយថា បើ​ប្រៀប​ធៀប​ទៅនឹង​ប្រទេស​ថៃ ជាទី​ដែលមាន​និវត្តជន​ជប៉ុន ​ប្រហែល ៨ ម៉ឺន​នាក់​នោះ វា​គឺជា​ចំនួន​ដ៏​តិចតួច​ប៉ុណ្ណោះ ប៉ុន្តែ​លោក​ព្យាករ​ថា កម្ពុជា​អាច​ក្លាយជា​គោលដៅ​ថ្មី​សម្រាប់​ជនជាតិ​ជប៉ុន ដែល​ស្វែងរក​កន្លែង​ស្នាក់នៅ និង​ចូល​និវត្តន៍​។​

​លោក Tani Shunji ដែល​ធ្លាប់​ប្រឡូក​ក្នុង​វិស័យ​អចលនទ្រព្យ​នៅ​ទីក្រុង​កូ​បេ អស់​រយៈពេល ២១ ឆ្នាំ​មកហើយ​នោះ បាន​និយាយ​ថា​ ៖ «​ខ្ញុំ​សង្កេត​ឃើញថា មាន​កំណើន​តម្រូវការ​ខុន​ដូ​បែប​ជប៉ុន​នៅ​កម្ពុជា ក្នុងនោះ​មាន​ទាំង​ពលរដ្ឋ​ជប៉ុន​វ័យ​ចំណាស់​ដែល​កំពុង​ស្នាក់នៅ​ក្នុង​ ប្រទេស​កម្ពុជា​ផង​ដែរ​»​។​​

លោក Tani Shunji បាន​ឲ្យ​ដឹង​បន្ថែមថា គម្រោង​អភិវឌ្ឍ​ខុនដូ​របស់​លោក​ឈ្មោះ JTower ដែល​មាន​កម្ពស់ ២៣ ជាន់​នោះ បាន​លក់​អស់​ដល់​ទៅ ៦០ ភាគរយ ទៅដល់​អតិថិជន​ជនជាតិ​ជប៉ុន ក្នុងនោះ​មាន​ទាំង​ពលរដ្ឋ​​ជប៉ុន​វ័យ​ចាប់ពី ៦០ ឆ្នាំ ចំនួន ១២ នាក់​ផងដែរ​។​​

នៅក្នុង​សៀវភៅ «Global Aging Issues and Policies» របស់លោក​ដែល​ចេញផ្សាយ​នៅ​ឆ្នាំ ២០១៣ លោក Yushi Li បាន​សរសេរថា ដោយសារតែ​ជប៉ុន​​កំពុង​ប្រឈម​មុខ​នឹង​​ការ​ផ្លាស់​ប្ដូរ​ប្រជា​សាស្រ្ដជា​ បន្ដ​បន្ទាប់​ទៅរក​ចំនួន​ប្រជាជន​វ័យ​ចំណាស់​កាន់​តែ​ច្រើន​នោះបាន​ធ្វើ​មាន ​កំណើន​ពលរដ្ឋ​ជប៉ុន ​ស្វែងរក​ប្រទេស​នានាដែល​មាន​ស្ដង់ដារ​រស់​នៅ​ខ្ពស់​​ ជាមួយ​នឹង​ការចំ​ណាយ​ទាបជាង​នៅ​ប្រទេស​កំណើរ​របស់​ខ្លួន។​

យោងតាម​តួលេខ​ប្រចាំ​ខែ​មករា របស់​ក្រសួង​កិច្ចការ​ផ្ទៃក្នុង និង​ទំនាក់ទំនង​ជប៉ុន បាន​ឲ្យ​ដឹង​ថា ពលរដ្ឋ​​ជប៉ុន​វ័យ​ចំណាស់ៗ​កាន់​តែ​មាន​ចំនួន​ច្រើន​ឡើងៗ ដោយ​ក្នុងនោះ ៣៣ ភាគរយ នៃ​ប្រជាជន​សរុប ១២៦ លាន​នាក់ គឺជា​ពលរដ្ឋមាន​វ័យ​ចាប់ពី ៦០ ឆ្នាំ​ឡើង​។​​

យោងតាម​លោក Toshiaki Fukuda នាយក​មន្ទីរពេទ្យ​ជប៉ុន Sunrise Healthcare បាន​ឲ្យ​ដឹងថា ការ​ស្នាក់នៅ និង​ចូល​និវត្តន៍​ នៅ​បរទេសបាន​ក្លាយ​ជា​រឿង​សាមញ្ញ​ទៅហើយ​។​​

លោក​និយាយថា ​៖ «​ការ​ចូល​និវត្តន៍​នៅ​បរទេស គឺជា​និន្នាការ​កំពុង​កើន​ឡើងដោយ​សារតែ​ចំនួន​ពលរដ្ឋ​ជប៉ុន​វ័យ​ចំណាស់កំពុង ​កើន​ឡើង​។ភាពខុសគ្នា​ខាង​តម្លៃ​សេវា និង​ការ​ស្នាក់នៅ គឺជា​កត្តា​សំខាន់​»។​​

លោក Sasaki Seiichi និវត្តជន​ជប៉ុន​វ័យ ៦៦ ឆ្នាំ ដែល​កំពុង​​រស់នៅក្នុង​រាជធានី​ភ្នំពេញ​អស់​រយៈពេល​ជាង ១ ឆ្នាំ​មក​ហើយ​​នោះ គាត់​គឺជា​ពលរដ្ឋ​​ជប៉ុន​ម្នាក់​ក្នុង​ចំណោម​និវត្តជន​ជប៉ុន​ រស់​នៅឯ​បរទេស​។ លោក​បាន​ពន្យល់​ពី​មូល​ហេតុ​ដែល​លោក​ចាប់​អារម្មណ៍​​ចូលមក​រស់នៅ​ក្នុង​ ប្រទេស​កម្ពុជា​។​

លោក Sasaki Seiichi និយាយថា​ ៖ «​ខ្ញុំ​ដំបូង​ឡើយ​ចង់មកលេង​ប្រទេស​កម្ពុជា​ នៅ​ឆ្នាំ ១៩៧៥ នៅ​ដែល​ខ្ញុំកំពុង​ដើរ​លេង​នៅ​ប្រទេស​ថៃ ប៉ុន្តែ​ប្រទេស​កម្ពុជា​ស្ថិតក្នុង​សង្គ្រាម​នាពេល​នោះ​។ នៅ​ឆ្នាំ ២០០៥ ក្រុមហ៊ុន​វាយ​​នភណ្ឌ​ដែល​ខ្ញុំ​បាន​ធ្វើការ​អស់​រយៈពេល ៣០ ឆ្នាំ នៅ​ទីក្រុង​តូក្យូ បាន​ផ្ដល់​សំបុត្រ​ធ្វើដំណើរ​ដល់​ខ្ញុំ មកកាន់​តំបន់​អាស៊ីអាគ្នេយ៍ ដូច្នេះ ខ្ញុំ​សម្រេច​មក​ទស្សនា​ប្រទេស​កម្ពុជា​»​។​

លោក​បន្ថែមថា ដប់​ឆ្នាំ​ក្រោយ​មក ដោយ​ឃើញ​ប្រទេស​នេះ​មានការ​អភិវឌ្ឍ​ច្រើន លោក​បាន​សម្រេចចិត្ត​ចូលមក​ស្នាក់នៅ​ក្នុង​ប្រទេស​នេះ​។ ចំណែក​ភរិយា​របស់​លោក ដែល​កំពុង​បម្រើ​ការងារ​នៅទីក្រុង​តូ​ក្យូ​នៅឡើយ​នោះ នឹង​ផ្លាស់​មក​រស់នៅ​ជួបជុំ​ជាមួយ​លោក​នាពេល​ដ៏​ខ្លី​ខាងមុខ​។​​ខណៈពេល​ ដំបូង​លោក​ពិបាក​សម្រប​ខ្លួន ដោយ​ត្រូវ​រៀន​និយាយ​ភាសា​ខ្មែរ​ទាំង​រដាក់រដុប​នោះ បុរស​ជប៉ុន​វ័យ​ចំណាស់​រូបនេះ បាន​សម្រប​ខ្លួន​ទៅនឹង​ជីវភាព​​រស់​នៅកម្ពុជា​ដោយ​សន្សឹមៗ​។​

​លោក Sasaki Sei-ichi បាន​និយាយថា​៖ «​ខ្ញុំ​តែងតែ​មក​កាន់​​មជ្ឈមណ្ឌល​សហប្រតិបត្តិការ​កម្ពុជា ជប៉ុន ជាទី​ដែល​ខ្ញុំ​អាន​សៀវភៅ​ភាសា​ជប៉ុន និង​ខ្មែរ និង​ជជែក​លេង​ជាមួយ​ជនជាតិ​ជប៉ុន ក៏ដូចជា​និស្សិត​កម្ពុជា​ផងដែរ»។​

​ដោយ​តែងតែ​ធ្វើដំណើរ​ជា​ញឹកញាប់​ទៅកាន់​តំបន់​ប្រវត្តិសាស្ត្រ ដូចជា​ប្រាសាទអង្គរវត្ត និង​​ប្រាសាទ​កោះកេរ្តិ៍ ដែលមាន​រាង​ពីរ៉ាមីត និង​តំបន់​ព្រៃភ្នំ​បៃតង​ក្នុង​ខេត្តរតនគិរី​នោះ លោក Sasaki Seiichi បាន​កោតសរសើរ ដល់​ទេសភាពស្រស់​ស្អាត​របស់​ ​ប្រទេស​កម្ពុជា​។​

​ទោះជា​យ៉ាងណា លោក Sasaki Seiichi ក៏បាន​ជួបប្រទះ​នឹង​បទពិសោធ​គួរ​ឲ្យ​ភ្ញាក់ផ្អើល​ផងដែរ​នៅ​អំឡុងពេល​ ស្នាក់នៅ​ក្នុងប្រទេស​កម្ពុជា​។ លោក​លើក​ឡើង​បញ្ហា​សន្តិសុខ និង​សុវត្ថិភាព ជាពិសេស​ប្រព័ន្ធ​ដឹកជញ្ជូន​ដ៏រ​ញ៉ៃ​រ​ញ៉ៃ និង​ករណី​គ្រោះថ្នាក់​ចរាចរណ៍ ហើយ​បើក​រត់គេច​។ ក្រៅពីនេះ ខណៈពេល​ដែល​លោក​ធ្លាប់តែ​រស់នៅក្នុង​ប្រទេស​មាន​អនាម័យ​ល្អ​នោះ លោក Sasaki Seiichi បាន​រអ៊ូរទាំ​រឿង​សំរាម​នៅ​តាម​ផ្លូវ និង​ការរំខាន​ពី​អ្នក​ជិត​ខាង​របស់គាត់ ដែល​តែងតែ​ផឹក​ស៊ីរ​ហូតដល់​យប់​ជ្រៅ​។

​​ខណៈ​លោក​ជឿថា ជនជាតិ​ជប៉ុន​ជាច្រើន​ទៀត​នឹង​សម្លឹង​មើល​​កម្ពុជា ជា​គោលដៅ​សម្រាប់​ចូលនិវត្តន៍​នោះ ឧបសគ្គ​ចម្បង​ដែល​រារាំង​ដល់​ការ​ចូលមក​ស្នាក់នៅ និង​ចូលនិវត្តន៍​នៅ​កម្ពុជា​របស់​ពលរដ្ឋ​ជប៉ុន​វ័យ​ចំណាស់​នោះ គឺ​កង្វះខាត​ប្រព័ន្ធ​ថែទាំ​សុខាភិបាល​ដ៏​សមរម្យ​មួយ​។

​លោក Sasaki Seiichi ឲ្យ​ដឹងថា ប្រសិនបើ​ប្រព័ន្ធ​សុខាភិបាល​ល្អប្រសើរ​នោះ លោក​នឹង​សប្បាយ​រីករាយ​ណាស់ ដោយ​មិនចាំបាច់​ធ្វើដំណើរ​ត្រឡប់​ទៅ​មក​​នោះ​ឡើយ​។​​លោក Sasaki Seiichi និយាយថា​ ៖ «​ដោយសារ​ហេតុ​ផល​​ខាង​សុខាភិបាល ខ្ញុំ​តែងតែ​ត្រឡប់​ទៅ​ប្រទេស​កំណើត​របស់​ខ្ញុំវិញ ដើម្បី​ត្រួតពិនិត្យ​សុខភាព និង​ព្យាបាល​ជំងឺ​»​។

​​យោងតាម​របាយការណ៍​ពី​ក្រសួង​ទេសចរណ៍​កម្ពុជា បាន​ឲ្យ​ដឹងថា ពលរដ្ឋ​ជប៉ុន​ដែល​បាន​ចូលមក​ប្រទេស​កម្ពុជា​នៅ​ចន្លោះ​ខែមករា​ដល់​ ខែវិច្ឆិកា​ឆ្នាំ ២០១៥ មាន​ចំនួន​ជាង ១៧ ម៉ឺន​នាក់ ដោយ​បាន​ធ្លាក់ចុះ ១១,៥ ភាគរយ បើ​ប្រៀបធៀប​ទៅនឹង​រយៈពេល​ដូច​គ្នា​​ក្នុង​ឆ្នាំ ២០១៤។ ​​ថ្វីបើ​យ៉ាងនេះ​ក៏ដោយ ក្រសួង​ទេស​ចរណ៍ បាន​រកឃើញ​កំណើន​ពលរដ្ឋ​ជប៉ុន ​ដែល​បាន​ចូល​មក​ក្នុង​ប្រទេស​កម្ពុជាសម្រាប់​គោលដៅ​ពាណិជ្ជកម្ម ដោយបាន​កើន​ពី ១៣៤៥៧ នាក់​នៅ​ឆ្នាំ ២០១៤ ទៅដល់ ២០៤៣៩ នាក់​នៅ​ឆ្នាំ ២០១៥​។

ទោះជា​យ៉ាងណា តួលេខ​​នេះ នៅតែ​មិនបាន​បញ្ជាក់​ច្បាស់​អំពី​ចំនួន​ពលរដ្ឋ​ជប៉ុន ចូល​មក​ក្នុង​ប្រទេស​កម្ពុជា​ ក្នុង​គោល​បំណង​ចូលនិវត្តន៍​នោះឡើយ​។​​ប៉ុន្តែជាមួយ​ការចំណាយ​ទៅ​លើ​ ការរស់នៅ​ទាប​ជាង​ប្រទេស​ថៃ លោក Seiichi ជឿជាក់ថា លោក​គ្រាន់តែ​ជា​ពលរដ្ឋ​ជប៉ុន​ម្នាក់​ក្នុង ចំណោម​ពលរដ្ឋ​ជប៉ុន​ ជាច្រើន​នាក់​ទៀតដែល​បាន​ចូលមក​ស្នាក់ នៅ និង​ចូលនិវត្តន៍​នៅ​ក្នុង​ប្រទេស​នេះ​។​

​លោក Fukuda និយាយថា​ ៖ «​ស្ថានភាព​រស់នៅក្នុង​ប្រទេស​កម្ពុជាកាន់តែ​ប្រសើរឡើង ដូច្នេះនៅ​ ​ថ្ងៃ​អនាគត កម្ពុជា​អាចជា​កន្លែង​មួយ​សម្រាប់​ឲ្យ​ពលរដ្ឋ​ជប៉ុនរីករាយ​នឹង​ការចូល​ និវត្តន៍»។​

​លោក Fukuda បន្ថែមថា​៖ «តាម​មតិ​ខ្ញុំ ឧបសគ្គ​ដែលរារាំង​ការចូល​មក​ស្នាក់នៅ​របស់​ជនជាតិ​ជប៉ុន គឺ​ហេដ្ឋារចនាសម្ព័ន្ធ​មិនគួរ​ឲ្យ​ពេញចិត្ត​។ ពលរដ្ឋ​ជប៉ុន​វ័យ​ចំណាស់ ចង់​រស់នៅ​ឲ្យ​ផុត​ស្ត្រេ​ស មាន​ប្រព័ន្ធ​ដឹកជញ្ជូន​ល្អ ចរន្តអគ្គិសនី​មិន​ដាច់ និង​ជាពិសេស​មានការ​គាំពារ​ផ្នែកវេជ្ជសាស្ត្រ​»៕

ថ្ងៃទី២៨ខែមករាឆ្នាំ២០១៦

ប្រភពៈ ភ្នំពេញប៉ុសិ៏


Was This Post Helpful:

0 votes, 0 avg. rating

Leave a Comment