ការ​អភិវឌ្ឍ​សម្រាប់​គ

ការ​ផ្គត់ផ្គង់​ខុនដូ​ដែល​មាន​តម្លៃ​ខ្ពស់​បន្ត​ហួស​ពី​តម្រូវការ​ដោយសារ ​ភាព​អសមត្ថភាព​ក្នុង​ការ​បំពេញ​តម្រូវការ​គេហដ្ឋាន​នៅក្នុង​ស្រុក​ខណៈ​ពេល​ ដែល​មាន​សម្ពាធ​ដើម្បី​បង្កើន​ល្បឿន​ធ្វើ​នគរូបនីយកម្ម​ទីក្រុង​ភ្នំពេញ​នា​ ពេល​នេះ​ផង​ដែរ​។

ដោយ​ហេតុ​នេះ​ហើយ​អ្នក​អភិវឌ្ឍ​កំពុង​ចាប់ផ្តើម​ផ្តោត​សំខាន់​ទៅ​លើ​ ខុនដូ​ធុន​កណ្តាល​មាន​តម្លៃ​មធ្យម​ដើម្បី​បំពេញ​តម្រូវការ​របស់​ក្រុម​ ប្រជាជន​ធុន​កណ្តាល​ដែល​កំពុង​តែ​មាន​​ចំនួន​កើនឡើង​ជាង​មុន​បើ​ទោះបី​ជា​ ស្ថិត​ក្នុង​ល្បឿន​យឺត​ក៏ដោយ​។ អ្នក​ជំនាញ​ផ្នែក​អចលនទ្រព្យ​និយាយ​ថា​ក្រុម​ប្រជាជន​​វណ្ណៈ​កណ្តាល​នោះ​ កំពុង​ផ្លាស់ប្តូរ​ទម្លាប់​ក្នុង​ការ​រស់នៅ​របស់​ពួកគេ។

បើ​យោង​ទៅ​តាម​របាយការណ៍​ប្រចាំ​ឆមាស​ទី​បី​របស់ CBRE ដែល​មិន​ទាន់​បាន​ចេញ​បោះពុម្ព​ផ្សាយ​បាន​ឲ្យ​ដឹង​ថា​តួ​លេខ​ស្រាវជ្រាវ​ កាលពី​ពេល​ថ្មីៗ​នេះ​កំណើន​នៃ​ការ​ផ្គត់ផ្គង់​ខុនដូ​បាន​កើនឡើង​ដល់ ២០,០០០ ​យូនីត​នៅ​ឆ្នាំ​ ២០១៨ ដែល​ក្នុង​នោះ​មាន ៤៥ ​ភាគរយ​នៃ​ចំនួន​ទាំងអស់​នោះ​គឺជា​ខុនដូ​ធុន​មធ្យម​ហើយ​ចំណែក​ខុនដូ​តម្លៃ​ ខ្ពស់​មាន​ចំនួន​ស្មើ​នឹង​ ៣៥ ​ភាគរយ​។

តួលេខ​នៃ​ការ​ផ្គត់ផ្គង់​នេះ​ត្រូវ​បាន​អ្នក​ជំនាញ​ផ្នែក​អចលនទ្រព្យ​ ជាច្រើន​ជឿជាក់​ថា​នេះ​ជា​តួលេខ​ដែល​មិន​សមស្រប​នឹង​តម្រូវការ​ពិតប្រាកដ​ ដោយសារ​ប្រជាជន​កម្ពុជា​ភាគច្រើន​ដែល​ចាប់​អារម្មណ៍​លើ​ខុនដូ​មិន​មាន​ ប្រាក់​គ្រប់គ្រាន់​ដើម្បី​ទិញ​ខុនដូ​ដែល​មាន​តម្លៃ​ខ្ពស់​នោះ​ទេ។

លោក ហ្គូស ខេវិន ប្រធាន​ប្រតិបត្តិ​របស់ Century21 កម្ពុជា​និយាយ​ថា​៖ «​ការ​ស្រាវជ្រាវ​ពិតប្រាកដ​បង្ហាញ​ថា​មិន​មាន​នរណា​ទិញ​ខុនដូ​តម្លៃ​ខ្ពស់​ ទេ​នៅពេល​នេះ​។ ដូច្នេះ​យើង​គ្មាន​ផល​អាជីវកម្ម​ឡើយ​។​»

ដោយ​ហេតុ​នេះ​ហើយ​អ្នក​អភិវឌ្ឍ​កំពុង​ផ្ទេរ​ទិសដៅ​ទៅ​កាន់​ខុនដូ​ធុន​ កណ្តាល​វិញ​ដែល​វា​មាន​តម្លៃ​ប្រហែល​ជា ១,០០០ ​ទៅ ១,៥០០ ​ដុល្លារ​ក្នុង​មួយ​ម៉ែត្រការ៉េ​ហើយ​យូនីត​នីមួយៗ​មាន​តម្លៃ​ពី ២៨,០០០ ទៅ ៩០,០០០ ​ដុល្លារ។

លោក អៀ សារ៉ាបុត្រ ប្រធាន​គ្រប់គ្រង​របស់ ម៉េកស៊ីមប្រផឺធី បាន​និយាយ​ថា​៖ «​នា​ឥឡូវ​នេះ​យើង​ក៏​ឃើញ​មាន​តម្រូវការ​សម្រាប់​ខុនដូ​ធុន​កណ្តាល​ច្រើន​ ជាង​មុន​។ រីឯ​អ្នក​អភិវឌ្ឍ​កំពុង​តែ​ដឹង​ពី​ប្រការ​នេះ​ហើយ​។ ពួកគេ​ក៏​ចាប់ផ្តើម​យល់​ពី​ទីផ្សារ​ជាង​មុន​ផង​ដែរ​»​។

លោក ហ្គូស ជឿ​ថា​ឥឡូវ​នេះ​ជា​ពេល​ដែល​យើង​គួរ​ផ្តោត​សំខាន់​ទៅ​លើ​ផ្នែក​ធុន​កណ្តាល​ ដោយសារ​ប្រជាសាស្ត្រ​បង្ហាញ​ថា​ក្រុម​អតិថិជន​ធុន​កណ្តាល​នឹង​បន្ត​កើនឡើង។

គាត់​បាន​និយាយ​ថា​៖ «​អនាគត​របស់​វិស័យ​អចលនទ្រព្យ​​នៅក្នុង​ស្រុក​នា​ពេល​បច្ចុប្បន្ន​នេះ​ កំពុង​ផ្តោត​សំខាន់​ទៅលើ​ទីផ្សារ​ប្រជាជន​វណ្ណៈ​កណ្តាល និង​ទីផ្សារ​ដែល​សម្បូរ​ទ្រព្យ​ធុន​ដែល​កំពុង​កើន​ឡើង​ដែរ​»​។

គាត់​បាន​បន្ថែម​ទៀត​ថា​៖ «​នៅ​ពេល​ដែល​យើង​ចាប់​ផ្តើម​មើល​ឃើញ​ថា​ក្រុម​ប្រជាជន​វណ្ណៈ​​កណ្តាល​កំពុង ​កើន​ឡើង និង​មាន​អំណាច​ក្នុង​ការ​ទិញ​ពួកយើង​ក៏​​ចាប់ផ្តើម​មើល​ឃើញ​ពី​ការ​ រីកចម្រើន​លូតលាស់​អចលនទ្រព្យ​នៅ​កម្ពុជា​ផង​ដែរ​»​។

លោក អៀ និង​លោក ហ្គូស ជឿ​ថា​ខណៈ​ពេល​ដែល​អ្នក​អភិវឌ្ឍ​ចាប់ផ្តើម​វិភាគ​សក្តានុពល​ទីផ្សារ​ខុនដូ​ ធុន​កណ្តាល​នោះ​មើល​ទៅ​ជម្រើស​​ហិរញ្ញវត្ថុ និង​ផែនការ​បង់​ប្រាក់​នឹង​មក​តាម​ក្រោយ​។ ប្រការ​នេះ​​នាំ​ឲ្យ​អតិថិជន​ក្នុង​ស្រុក​អាច​នឹង​មាន​ឱកាស​ច្រើន​ជាង​មុន​ ក្នុង​ការ​​ទទួល​បាន​គេហដ្ឋាន​ខុនដូ​។

ការ​ស្រាវជ្រាវ​បន្ថែម​បង្ហាញ​ថា​ទីផ្សារ​ខុនដូ​ធុន​កណ្តាល​កំពុង​មាន​ ភាព​ទាក់ទាញ​ច្រើន​ឡើងៗ​អ្នក​ជំនាញ​ផ្នែក​អចលនទ្រព្យ​ក៏​ចាប់ផ្តើម​កំណត់​ លក្ខណៈ​ប្រជាសាស្ត្រ​នៃ​អតិថិជន​របស់​ពួកគេ​ផង​ដែរ​។

លោក អៀ និយាយ​ថា​៖ «​ខ្ញុំ​តែងតែ​ចែក​រឿង​នេះ​ជា​ផ្នែកៗ​។ វា​មាន​ផ្នែក​ធុន​កណ្តាល​សម្រាប់​អ្នក​មាន​ចំណូល​រវាង ៨០០ ទៅ ២០០០ ​ដុល្លារ​ប្រចាំ​ខែ​។ ចំណែកឯ​ចំណូល​សម្រាប់​អ្នក​សម្បូរ​ទ្រព្យ​គឺ​នៅ​រវាង ២,៥០០ ទៅ ៥,០០០ ដុល្លារ​ក្នុង​មួយ​ខែ​»​។

អតិថិជន​ទាំង​នេះ​ភាគច្រើន​ជា​និស្សិត​ដែល​បាន​បញ្ចប់​ការ​សិក្សា​ពី​ មហាវិទ្យាល័យ​ជា​គូ​ស្វាមី​ភរិយា​ដែល​ទើប​នឹង​រៀបការ​ថ្មីៗ​ដែល​មាន​​ការងារ ​ធ្វើ​ទាំង​ពីរ​នាក់ ឬ​ជា​ក្រុម​គ្រួសារ​មាន​ទំហំ​តូច​ដែល​រួម​បញ្ចូល​ប្រាក់​ចំណូល​របស់​ពួកគេ​ រួម​គ្នា។

លោក អៀ បន្ថែម​ថា​ការ​កើន​ឡើង​នៃ​ទឹកប្រាក់​របស់​អ្នក​ធ្វើការ​ក្មេងៗ​មិនមែន​ជា​ មូលហេតុ​តែ​មួយ​​ដែល​ធ្វើ​ឲ្យ​ខុនដូ​ធុន​កណ្តាល​មាន​​សភាព​ទាក់ទាញ​ជាង​មុន​ នោះ​ទេ​។ ការ​ផ្លាស់ប្តូរ​សង្គម​ក៏​ជា​មូលហេតុ​មួយ​ផង​ដែរ​។

លោក​បាន​បន្ត​ទៀត​ថា​អ្នក​ធ្វើការ​វ័យ​ក្មេង​​មាន​ទំនោរ​មាន​ចិត្ត​ទូលាយ ​ជាង​​មុន​ហើយ​ពួកគេ​ក៏​តែងតែ​ចង់​បំបែក​ខ្លួន​ចេញ​ពី​ការ​រស់នៅ​ជួបជុំ​ គ្រួសារ​ជា​ធម្មតា​ហើយ​រស់នៅ​ដោយ​ខ្លួន​ឯង​ស្រប​ពេល​ដែល​កន្លែង​រស់នៅ​របស់​ ពួកគេ​នៅ​ជិត​កន្លែង​ធ្វើការ​របស់​ខ្លួន ជិត​ផ្សារ​លក់​អីវ៉ាន់ ភោជនីយដ្ឋាន និង​បារ​ជាដើម​។

លោក អៀ និយាយ​ថា៖ «​អ្វី​ដែល​ទាក់ទាញ​ពួកគេ​គឺ​របៀប​រស់នៅ​ក្នុង​ទីក្រុង និង​ការ​ដែល​ពួកគេ​អាច​ធ្វើ​ដំណើរ​ទៅ​កាន់​តំបន់​ដែល​គេ​ពេញនិយម​»​។

ក្នុង​ពេល​ជាមួយ​គ្នា​នេះ​ដែរ​ការ​លូតលាស់​អំពី​របៀប​រស់នៅ​ក្នុង​ខុនដូ​ នៅ​ទីក្រុង​ត្រូវ​បាន​គ្រប់គ្រង​ដោយ​ភាព​ពិត​របស់​ទីផ្សារ​។ ប្រជាជន​គ្មាន​ប្រាក់​ដើម្បី​បន្ត​ទំនៀម​ទម្លាប់​ក្នុង​ការ​ទិញ​គេហដ្ឋាន​ ដែល​មាន​ដី​ផ្ទាល់​ដើម្បី​រស់​នៅ​តទៅ​ទៀត​នោះ​ទេ​។

លោក អៀ និយាយ​ថា​៖ «​ទោះបី​ជា​នៅក្នុង​ទីក្រុង​ភ្នំពេញ​ឥឡូវ​នេះ​ប្រជាជន​កម្ពុជា​នៅ​តែ​ចូល​ ចិត្ត​រស់​នៅក្នុង​គេហដ្ឋាន​ដែល​មាន​ដី​ផ្ទាល់​ខ្លួន​ដូចជា shophouse និង​ផ្ទះល្វែង​ជាដើម​ក៏ដោយ​ក៏​អ្នក​មិន​អាច​រក​បាន​ផ្ទះល្វែង​កម្ពស់​បី​ ជាន់​ធម្មតា​ដែល​មាន​តម្លៃ​ទាប​ជាង ២០០,០០០ ​ដុល្លារ​បាន​ឡើយ​»៕


Leave a Comment