ទីផ្សារ​ខុនដូរ​បន្ត​កើន​ឡើង អ្នក​វិនិយោគ​សម្លឹង​រក​ទីតាំង​ថ្មីៗ

ទីផ្សារ​ខុនដូរ​បន្ត​កើន​ឡើង អ្នក​វិនិយោគ​សម្លឹង​រក​ទីតាំង​ថ្មីៗ

ភ្នំពេញៈ ខណៈ​ពេល​ដែល​តំបន់​កណ្តាល​ទីក្រុង ភ្នំពេញ ជាពិសេស​ខណ្ឌ​ចម្ការមន ដែល​ជា​តំបន់​ខុនដូ​ទំនើបៗ និង​ផ្ទះ​ល្វែង​ប្រណីត ក៏​ដូចជា​តំបន់​បឹង​កេងកង ១ ដែល​កាន់​តែ​មាន​ការ​កកស្ទះ បាន​បង្ហាញ​ពី​ការ​កើន​ឡើង​យ៉ាង​ខ្លាំង​នា​ប៉ុន្មាន​ឆ្នាំ​នេះ ​និង​​កង្វះ​ខាត​តំបន់​ដែល​អាច​សាង​សង់​សំណង់ និង​តម្លៃ​ដី​ខ្ពស់ អាច​ធ្វើ​ឲ្យ​អ្នក​វិនិយោគ​ផ្លាស់​ប្តូរ​គោល​ដៅ​ទៅ​ទី​កន្លែង​បន្ទាប់​បន្សំ ​ក្នុង​រយៈពេល​ប៉ុន្មាន​ឆ្នាំ​ខាង​មុខ​នេះ។

បើ​យោង​ទៅ​តាម​របាយការណ៍​ត្រី​មាស​ទី ៤ ប្រចាំ​ឆ្នាំ ២០១៥ របស់ CBRE ដែល​ទើប​បាន​ចេញ​ផ្សាយ​នា​ពេល​ថ្មីៗ​នេះ បាន​បង្ហាញ​ថា នៅ​ក្នុង​ឆ្នាំ ២០១៥ មាន​ការ​កើន​ឡើង​នៃ​ការ​ផ្គត់​ផ្គង់​ខុនដូ​ចំនួន ២០,២០ ភាគរយ ឬ​ស្មើ​នឹង​ចំនួន ៧ ០១៤ យូនីត ដែល​បាន​សម្ភោធ​ក្នុង​គម្រោង​អគារ​ចំនួន ២៦ នៅ​ចុង​ឆ្នាំ​កន្លង​មក។

នៅ​ក្នុង​តួ​លេខ​នេះ​ដែរ ខណ្ឌ​ចម្ការមន គឺ​មាន​ចំនួន ៣៧​ភាគរយ ដែល​ស្មើ​នឹង ២៥៩៧ យូនីត។ ក្នុង​ពេល​នេះ​ដែរ តម្លៃ​ដី​ក៏​កើន​ឡើង​នៅ​ខណ្ឌ​កណ្តាលៗ​ទីក្រុង​ភ្នំពេញ ដូចជា ខណ្ឌ​ចម្ការមន ដូនពេញ ៧មករា និង​ទួលគោក គឺ​ស្មើ​នឹង ៨,៤០ ភាគរយ។

ទោះ​ជា​របាយការណ៍​នេះ​បាន​កត់​សម្គាល់​ថា តួ​លេខ​នៃ​ការ​លក់​ខុនដូ​ក្នុង​ឆ្នាំ ២០១៥ នៅ​ក្នុង​ទីក្រុង ភ្នំពេញ បង្ហាញ​ពី​ការ​កើន​ឡើង​នៅ​ក្នុង​ទីផ្សារ​ចំនួន ១១,១០ ភាគរយ នៅ​គ្រប់​កម្រិត​ថ្នាក់​ទាំង​អស់​ក៏​ដោយ ក៏​ខុនដូ​ថ្នាក់​កណ្តាល (តម្លៃ​ពី ២២៥០ ដុល្លារ ដល់ ២៦៥០ ដុល្លារ​ក្នុង​ម៉ែត្រ​ការ៉េ) នៅ​តែ​ទទួល​បាន​ចំនួន​ច្រើន​ជាង​គេ​ដែរ។ តម្លៃ​មធ្យម​នៃ​ខុនដូ​ទំនើប​កម្រិត​ខ្ពស់​កើន​ឡើង​ត្រឹម​តែ ២,៥០​ភាគរយ​តែ​ប៉ុណ្ណោះ ខណៈ​ពេល​ដែល​អចលនទ្រព្យ​ដែល​គេ​ចាត់​ទុក​ថា មាន​តម្លៃ​សមរម្យ​បាន​ធ្លាក់​ចុះ ១,៤០ ភាគរយ​នៅ​ឆ្នាំ​មុន។

ទោះ​ជា​យ៉ាង​ណា តំបន់​បន្ទាប់បន្សំ​ដែល​នៅ​មិន​ទាន់​បាន​អភិវឌ្ឍ​ដោយសារ​កង្វះខាត​ហេដ្ឋា​ រចនា​សម្ព័ន្ធ ដូចជា ខណ្ឌ​សែនសុខ និង​ជ្រោយ​ចង្វារ ក៏​កំពុង​តែ​មាន​ការ​កើន​ឡើង ឬ​ស្មើ​នឹង ១៥​ភាគរយ​នៃ​យូនីត​ថ្មី​ដែល​ទើប​នឹង​ត្រូវ​បាន​ប្រកាស។

ទាំង​នេះ​គឺជា​ការ​ផ្លាស់​ប្តូរ​មួយ​ដែល​គួរ​ឲ្យ​កត់​សម្គាល់ ដោយ​តំបន់​កណ្តាល​ក្រុង​ធ្លាប់​តែ​ត្រូវ​បាន​ចាត់​ទុក​ថា ជា​តំបន់​ល្អ​ជាង​គេ​សម្រាប់​ទីផ្សារ​វិនិយោគ​សម្រាប់​អចលនទ្រព្យ។

លោក Chris Hobden អ្នក​គ្រប់គ្រង CBRE កម្ពុជា​បាន​និយាយ​ថា តួលេខ​នេះ​អាច​នឹង​កើន​ឡើង​នៅ​ក្នុង​អំឡុង​ពីរ​ឆ្នាំ​ខាង​មុខ​ដោយ​តំបន់​ កណ្តាល​ក្រុង​ដែល​ត្រូវ​បាន​វិនិយោគ​យ៉ាង​ច្រើន​ហើយ​នោះ នឹង​អាច​ធ្វើ​ឲ្យ​មាន​ផល​ពិបាក​ដល់​ការ​វិនិយោគ​ធំៗ។

លោក​បន្ត​ថា៖ «ការ​ផ្លាស់​ប្តូរ​ទៅ​តំបន់​បន្ទាប់​បន្សំ គឺ​បណ្តាល​មក​ពី​ការ​កើន​ឡើង​នៃ​តម្លៃ​ដី​នៅ​កណ្តាល​ទីក្រុង ក៏​ដូចជា​ចំនួន​ដី​ទំនេរ​ដែល​មាន​កំណត់»។

លោក​បញ្ជាក់​ថា អ្នក​វិនិយោគ​ខ្នាត​ធំ និង​ការ​វិនិយោគ​សម្រាប់​ការ​ប្រើ​ប្រាស់​ចម្រុះ កំពុង​តែ​សម្លឹង​មើល​តំបន់​បន្ទាប់​បន្សំ​សម្រាប់​សក្តានុពល​នៅ​រយៈពេល​យូរ។ បើ​ទោះ​បី​ជា​ផល​ប្រយោជន៍​របស់​តំបន់​បន្ទាប់​បន្សំ​នេះ នៅ​មិន​ទាន់​ច្បាស់​ក៏​ដោយ វា​បាន​ផ្តល់​ជា​ជម្រើស​ច្រើន​ដល់​អ្នក​វិនិយោគ ក្នុង​ការ​រៀប​ចំ​គម្រោង​វិនិយោគ​ខ្នាត​ធំ ហើយ​មិន​រង​ផល​ប៉ះពាល់​ពី​ផ្លូវ​តូច​ចង្អៀត ចំនួន​ប្រជាជន​ច្រើន​ពេក ហើយ​ចរាចរណ៍​ស្ទះ​ចង្អៀត​នោះ​ទេ»។

ទោះ​បី​ហេដ្ឋារចនា​សម្ព័ន្ធ​នៅ​តែ​មិន​ទាន់​រីក​ចម្រើន​សម្រាប់​ភាព​ជោគ​ ជ័យ​នៃ​ការ​វិនិយោគ​នៅ​តំបន់​បន្ទាប់​បន្សំ​ទាំង​នេះ​ក៏​ដោយ ប៉ុន្តែ​លោក Hobden បាន​បន្ថែម​ថា៖ «គន្លឹះ​នៃ​ការ​ទាញ​យក​ខណ្ឌ​បន្ទាប់​បន្សំ​ក្នុង​រយៈពេល​យូរ គឺ​ផ្អែក​ទៅ​លើ​ការ​អភិវឌ្ឍ​ហេដ្ឋា​រចនា​សម្ព័ន្ធ និង​ការ​ផ្តល់​ឲ្យ​នៃ​គម្រោង​ដែល​មាន​គុណ​ភាព​ខ្ពស់​រួម​បញ្ចូល​នឹង​ការ​ ប្រើ​ប្រាស់​ចម្រុះ»។

បើ​និយាយ​ពី​ទីផ្សារ​វិញ លោក​បាន​និយាយ​ថា ការ​វិនិយោគ​នៅ​តំបន់​បន្ទាប់​បន្សំ​អាច​ដាក់​តម្លៃ​ដែល​មាន​លក្ខណៈ​ប្រកួត​ ប្រជែង​ជាង ហើយ​អាច​នឹង​ផ្តល់​ជា​ទុន​ដែល​កើន​ឡើង​បាន​ខ្ពស់​ជាង។

លោក Hobden ថា៖ «នៅ​ពេល​ដែល​ទីក្រុង​រីក​ចេញ(ទៅក្រៅ) វា​អាច​នឹង​ផ្តល់​ភាព​ទាក់​ទាញ​យ៉ាង​ខ្លាំង​ទៅ​ដល់​អ្នក​ដែល​កំពុង​តែ​ សម្លឹង​មើល​រក​ទិញ»៕

ថ្ងៃទី២៦ខែកម្ភៈភ​​​ឆ្នាំ២០១៦

ប្រភពៈ ភ្នំពេញប៉ុសិ៏


Was This Post Helpful:

0 votes, 0 avg. rating

Leave a Comment